|
Famille ESTIVAL - MORÈNE | Contrat de mariage : 7 avril 1571 à ?, Source : Jean-Louis CRESPIN AD34 II E 95/63 f° 150
(présent) de PRATS, Pierre, beau-frère de la mariée
(présent) MOUREAU, Jacques
Acte à rechercher.
Source : Jean-Louis CRESPIN AD34 II E 95/63 f° 150
L'an de grâce 1571 et le 18/3, très crestien prince Charles, par la grace de Dieu, roi de France régnant, scaichent touts présents et advenir, comme mariage soict meu et traité de parolle et ce accomplira en saincte mère esglise, ainsin qu'est l'enscienne coustume entre fils crestiens,
ENTRE Pierre ESTIVAL, fils légitime et naturel de Jehan ESTIVAL sarrusier et de Clarete JORDANE, mariés habitans de la ville d'Aniane, diocèze de Montpellier, d'une part,
ET Andrine MOURÈNE, filhe légitime et naturelle de feu Loys MOUREAU et de Catherine APCHIERE vivente dudit Aniane, d'aultre part,
Et comme soict l'enscienne coustume et au présent pays observer que nul mariage ne se doibt faire, ni estre faict sans constitution de doaire et verquière, lequel deuire [douaire] la partie des femmes doibt estre apporté(e), et ce pour et affin queledict mariage soict plus facillement susporté et les charges de icelluy tollérées.
A CESTE CAUSE, personnellement estably Jacques MOUREAU, fils légitime et naturel dudit feu Loys et son hérétier universel habitant dudit Aniane, lequel, de son bon gré, et par la teneur du présent instrument fermement vallable et irrévocable, tant pour le léguat délayssé par ledit feu Loys, son père, à ladite Andrine à son dernier testement, a donné, constitué, assigné en doaire et verquière à ladite Andrine MOURÈNE, sa s(o)eur, une avec ledit Pierre ESTIVAL, futurs mariés, présens, estipullans et acceptans, la somme de 40 Livres tournois, deux robbes nubtielles drap de Bo(u)rges, cotte et gonelle, coleur de noiret rouge, bon(n)es, neufves, faictes et pour amour, faveur et contemplation dudit mariage, auquel ayant bon plaisir en icelluy, que pour amour cédulle [union] fraternelle donne, constitue, assigne en augmentation dudit doaire et verquière à ladite Andrine sa s(o)eur avec ledit ESTIVAL futeurs mariés, présens, estipullans et acceptans, la somme de 10 Livres tournois, unerobbe gonelle drap blanquet, bon(n)e, neufve et faicte, laquelle présente constitution, confirmation et augmentation du susdit doaire et verquière a faict ledit Jacques MOUREAU, frère constituisseur, confirmation et augmentation à ladite Andrine MOURÈNE, sa s(o)eur, une avec ledit Pierre ESTIVAL, feuteurs mariés, une avec les pactes, conditions, rétentions que s'ensuivent :
ET PREMIEREMENT, est pacte entre lesdites parties, et de pacte exprès devant (?) conveneu, accordé, c'est que ledict Jacques MOUREAU, frère et constituisseur augmentant, sera tenu et a promys ausdits futurs mariés présents payer et satisfère la susdite constitution et confirmation tant de la susdite somme que robbes.
C'est àssavoir le jour que ledit feuteur mariage se solempnisera en saincte mère esglise la susdite somme de 50 Livres tournois et robbes nubtielles, et l'aultre robbe drap blanquet de jour an jour à la volunté desdits feuturs mariés et de leurs dabondans, ledit Jacques MOUREAU , lequel de son bon gré, pure, franche et libéralle volunté, par la teneur du présent instrument au nom de comme ayant charge, permission, comme a dict, de satge femme done Catherine APCHIERE sa mère, laquelle a promys fère rattiffier toutes et qualles foys an sera requis sur les obligations, soubmissions, jurements, renonciations de soubs scripts, a donné, constitué, assigné an doaire et verquière aus susdits futeurs mariés présens, estipullans et acceptans, par tous et chascungs les biens, droicts, actions maternels que ladite Andrine a ou pourroict avoir de présent ou advenir, apartenir pour que(l) droit que se soict, la somme de 100 Livres tournois, monnoye courante, laquelle somme de 100 Livres tournois ledict Jacques MOUREAU, frère, a promys ausdits futeurs mariés payer et satisfaire, c'est le jour que ledict futeur mariage se solempnisera an saincte mère esglise, la somme de 50 Livres tournois, et les autres 50 Livres tournois en jour de Caramantrant [caresme entrant], après an suyvant en ung an révolu(t) et complet les 10 Livres tournois en accarramantrant, après an suyvant 10 Livres tournois, et tous les ans ausdit jour continuant lesdites solventions [payments] et payes de 10 Livres tournois finies avant que ladite somme soict entièrement payée et sattisfaicte et que l'une paye ne se pourra accomoler l'une sur l'aultre que ne coste de sousfizente déligence [diligence] estre demandée, recquize.
ITEM, est pacte entre lesdites parties et de pacte exprès conveneu et accordé c'est que ledit Pierre ESTIVAL sera teneu et a promys la susdite constitution, confirmation, augmentation dessus expéciffiées, descriptes à ladite Andrine MOURÈNE sa femme faire recognoistre sur tous et chascungs ses biens, droicts et actions, meubles, immeubles, présents et advenir, et en cas de restitution, laquelle chose dieu ne vuelhe permetre, rendre et restituer à ladite Andrine sa futeurefemme et aux siens, c'est les susdites sommes tout ainsin que se treuveront estre payées et recogneues et lesdites robbes an l'estat que se treuveront audit temps de ladite restitution.
ITEM, est pacte entre lesdites parties respectivement et de pacte exprès conveneu et accordé c'est que ledit Pierre ESTIVAL sera teneu et a promys, et promet le jour de la solempnisation de son futeur mariage donner ladite auctorité à ladite Andrine sa futeure femme de quiter, céder, remetre et relaxer tous et chascungs ses autres biens, droicts et actions paternels, maternels et fraternels, audit Jacques MOUREAU, son fraire, et aux siens de ladite Andrine de l'avis de son futeur mary prometiceux biens, droicts quicter audit son frère et aux siens et instrument de quictance faire et passer.
ITEM est pacte entre Me Pierre de PRATZ, beau-frère de ladite Andrine, lequel ay avec ledit plaisir, de son bon gré et par la teneur du présent instrument a donné en augmentation au susdit futeurs mariés présens la somme de 10 Livres tournois payables la moytié le jour de la solempnisation dudit mariage et l'aultre moytié dudit jour de la solempnisation an ung an révoleu et complet avec pacte que ledit présent sera teneu et a promys recognoistre sur ses biens à ladite Andrine et échéant de restituer, rendre à ladite Andrine et aux siens comme dessus.
Et laquelle présente constitution, confirmation et augmentation dessus escripte contenue, une avec les pactes dessus escripts et toutes les choses dessus escriptes lesdites parties respectivement ont heu pour agréable et acceptable, et toutce dessus ont tenue, approuvé, émologué, rattisfié et de plain droict confirmé, et ont promys lesdites parties respectivement au contraire ne venir, ni faire venir, mais de poinct en poinct en promet tenir, servir, actendre, complir etobserver.
Et pour ce faire, lesdites parties, une envers l'aultre, respectivement ont obligé, yppothéqué touts et chascungs leurs biens, iceulx soubsmetant aux forces et rigueurs des cour(t)s du petit scel de Montpellier, grand de Carcassonne et B?ziers, cour(t) royalle de Ginhac, noveau estatut de icelle et à une chascune de icelles, et ainsin l'ont juré avec toute renonciation de droict à ce nécessaire.
Et tout incontinent,sans interval, en la présence de moy notaire et tesmoings soubs scripts, estably en personne Maistre Jehan ESTIVAL, sarrusier, habitant dudit Aniane, lequel ayant bon plaisir au susdit mariage, de présent son fils avec la susdite Andrine MOURÈNE et de sa licence, auctorité, mandement a esté faict et tracté, considérant avoir faict promesse audit Pierre son fils luy donner et faire donnation de la tierce part de tous et chascungs ses biens meubles, immeubles, présents et advenir, laquelle promesse a voleu, actendre et complir.
A ceste cause, de son bon gré, pure, franche et libéralle volunté, pour luy, les siens et advenir successeurs, par la teneur du présent et public instrument fermement vallable et irrévocable a donné, cédé, remys, aliéné et à tout jamais disemparé, et de présent donne, cède et transporte et ce par donation, cession et rémission que ce dict estre faicte entre les vifs, que au jour de nubtiès pour aucung droict ne contraire en faire, audit Pierre ESTIVAL, son fils présent, estipullant et acceptant, à toutes ses voluntés en faire tant en la vie que en la mort donant, venden exchangeant permutant, et autrement aliénant, àssavoir est la tierce part de tous et chascungs ses biens, droicts et actions, paternels où(t) que soient ni où(t) que non à luy apartenir, parvenir et temps advenir, expectant, meubles, immeubles, présents et advenir, quicter immune de touts charges, laquelle présente donation, cession et rémission de ladite tierce part de tous et chascungs ses biens, a faict ledit Me Jehan ESTIVAL, sarrusier, donateur, audit Pierre ESTIVAL son fils et donataire, présent pour amour dieu que pour amour, faveur et contemplation dudit mariage et susportation des chargesd'icelluy, avec pacte que ledit donateur se retient sieur usuffructuaire de ladite tierce part de sesdits biens que retiens tant que vivra en ce monde, desquels dicts biens donnés, cédés et relauxés, ledit donateur audit donataire présent a donné licence, auctorité, mandement espécial et général de prendre réalle, actuelle et corporelle possession de ladite tierce part de ses biens dessus donnés, remisés et relauxés toutes et quales foys le se voldra.
Et jusques à ce que ladite possession par ledit donataire soict prinse, ledit donateur c'est constitué icelle tenir au nom de précaire, et c'est d'austre de ladite tierce part de ses biens dessus donnés, et ledit Pierre, son fils et donataire, n'a investeu par le bailh de la cède [cédule], sur note du présent instrument, et l'a faict vray seigneur, juste possesseur et procuraire ainsin qu'en ses choses propres légitimement acquises, et que de hier an avant an puisse faire, tout ainsin que ledit donateur pouvoict faire par cy devant.
Laquelle donation, cession et rémission ledict donateur a heu pour agréable et acceptable, et tout ce dessus, et le contenu d'icelle a loué (?), approuvé, émolongué, ratisfié et de plain droict confirmé et a... dr... au contraire des choses susdites ne venir ni faire venir mais de poinct en poinct tenir, servir, actendre, complir et observer, et pour ce faire ledit donateur envers ledit donataire présent a obligé, yppothéqué tous et chascungs ses biens, et ainsin l'a juré avec toutes renonciation à ce droict mesmes.
Et pour corroboration et confirmation de tout ce dessus et suyvant l'ordonnance du Roy, notre sieur, que toutes donations, doivent estre insinuées.
A ceste cause les susdits Jehan ESTIVAL et Pierre ESTIVAL, père et fils, donateur et donataire, de leur bon gré et par la teneur du présent instrument, touts deux ensemble, respectivement ont faict avec leurs procureurs espéciaulx et généraulx, sans que la espalicé [espécialité] ne derrouge la qualité, ne [ni] au contraire ; àssavoir est Messieurs Maistres SANTOUL, [Augustin] BACHELARD, en leurs licences procureurs et advocats en la cour(t) royalle de Ginhac, et touts les autres et ung chacun d'eux en soit de parelhement et pour exprès pour et au nom desdits constituans s'en présenter et comparaistre en ladite court et pard[evant] icelle teneus présenter la susdite donation déclarer icelle ne estre faicte par dol, fraude, tromperie nidévertion, mais de gré et pour contemplation dudit mariage et charges d'icelle susporter et ainsin insinuées auctrement enregistrées et débat (?) in... estre interpousé, suyvant l'ordonnance du Roy, notre sieur, et faire tout ainsin que si lesditsconstituans y estoient à présent f..., ont promys lesdits constituans avoir, tenir pour agréable et acceptable tout ce que par sesdits procureurs sera faict, dict, procuré, exercé, et les relever de toute charge de procuration, et ainsin ont juré avec toute renonciation de droict à ce nécessaires. Et de ce dessus, lesdites parties respectivement ont requis acte et instrument à moy notaire royal soubs signé.
Faict et récité dans la ville de Aniane et maison de Me Pierre DE PRATZ. Présents : Me Anthoine BAULMELLE mareschal d'Aniane, Estienne BONIOL du mas de Boniol jurisdiction de La Boyssière habitans, soubs marqués et signés avec les parties. Et de moy Pierre ASSAZAT.
|
